Skip to content

Radio Evropaelire-Lajme

Përmbajtje e sindakuar Radio Evropa e Lirë
Radio Evropa e Lirë është organizatë ndërkombëtare e lajmeve dhe e transmetimeve për Evropën Qendrore dhe Lindore, Kaukazin, Azinë Qendrore, Rusinë, Lindjen e Mesme dhe Ballkanin.
Rifreskimi: 16 orë 28 min më parë

SHBA i jep dritën jeshile Malit të Zi në NATO

Mar, 03/28/2017 - 21:39
Senati i Shteteve të Bashkuara i dha miratimin final protokollit për anëtarësimin e Malit të Zi në NATO.
Kategoritë: Lajmet e ditës

Qeveria turke "ka spiunuar" kundërshtarët e saj në Gjermani

Mar, 03/28/2017 - 17:33
Ministri i Brendshëm i Gjermanisë, Thomas De Maiziere, tha se Turqia nuk do të lejohet t'i spiunojë turqit që jetojnë në Gjermani. Sipas disa raporteve, sherbimi turk i inteligjencës i ka dorëzuar shërbimit homolog gjerman një listë të njerëzve që dyshohet se mbështesin një lëvizje kundër presidentit turk, Recep Tayyip Erdogan. Lista thuhet se përfshin fotografi dhe të dhëna personale. Rreth 41,000 njerëz janë arrestuar në Turqi që nga përpjekja për grushtshtet, korrikun e kaluar. Shumë prej tyre dyshohet se ndjekin lëvizjen e klerikut fetar turk, Fethullah Gulen, i cil jeton në mërgim në SHBA. Turqia e ka akuzuar Gulenin për organizimin e përpjekjes për grushtshtet. "Aktivitetet e spiunimit në tokën gjermane janë kriminale dhe nuk do të pranohen nga ne. Kjo vlen për çdo vend të huaj dhe për çdo shërbim të inteligjencës. Andaj, aktivitetet e tilla po monitorohen nga Zyra Federale e Gjermanisë për Mbrojtjen e Kushtetutës. Kjo mund të ketë pasoja", tha ministri i Brendshëm i Gjermanisë, De Maiziere. Shërbimi i huaj sekret i Gjermanisë tha se nuk do të komentojë, porse agjencia e sigurisë së brendshme të vendit është duke shqyrtuar pretendimet.
Kategoritë: Lajmet e ditës

Vuçiq nuk shkon në Kosovë, thotë se nuk i pranon "shantazhet"

Mar, 03/28/2017 - 17:14
Kryeministri i Serbisë, Aleksandar Vuçiq, tha se nuk do të udhëtojë të mërkurën në Kosovë, sepse nuk pranon, siç tha, shantazhe nga Prishtina.  "Nuk vjen në shprehje ky lloj presioni dhe cirku që ka bërë Prishtina", tha Vuçiq, transmeton agjencia serbe e lajmeve Tanjug. Qeveria e Kosovës tha më herët se ka marrë vendim që t’i lejojë Vuçiqit të shkojë në Kosovë, në vizitën e paralajmëruar për fushatë zgjedhore. Ministri i Jashtëm i Kosovës, Enver Hoxhaj, tha se "pas kushteve të shumta të vëna nga ana e Qeverisë së Kosovës dhe pas diskutimeve të fundit në lidhje me vizitën, është marrë vendimi për lejimin e tij (Vuçiqit) që të vijë në Kosovë". "Kjo do të jetë edhe hera e fundit që lejohen të hyjnë zyrtarë serbë me qëllime të bërjes fushatë", tha Hoxhaj. Zgjedhjet presidenciale në Serbi mbahen më 2 prill dhe Vuçiq është njëri nga kandidatët. 
Kategoritë: Lajmet e ditës

"Çakalli Carlos" merr dënimin e tretë me burgim të përjetshëm

Mar, 03/28/2017 - 17:00
Një gjykatë franceze i shqiptoi terroristit ndërkombëtar, i njohur si Çakalli Carlos, dënimin e tretë me burgim të përjetshëm, për një sulm vdekjeprurës në Paris, rreth 42 vjet më parë. Carlos, i cili vjen nga Venezuela dhe emrin e vërtetë e ka Ilich Ramirez Sanchez, është duke shërbyer tashmë dy dënime të përjetshme në një burg të Francës, për vrasjen e tre njerëzve në vitin 1975 dhe për një seri sulmesh mbi trenat në Francë, të cilat kanë lënë 11 njerëz të vrarë dhe rreth 150 të plagosur në vitet 1982-83. Dënimi i fundit për Ramirezin, 67 vjeç, dikur njëri nga kriminelët më të kërkuar në botë, është për një sulm me granatë në qendër të Parisit, i cili ka ndodhur në vitin 1974 dhe ka lënë dy njerëz të vrarë dhe 34 të plagosur. Ramirez tha se gjyqi ka qenë "absurd" dhe se ai është gjykuar mbi dëshmi të rreme nga dëshmitarë që kanë qenë "të manipuluar" nga shërbimet franceze të sigurisë. Ramirez ka përqafuar besimet marksiste në vitet 1970 dhe 1980, ndërsa shpesh i ka shfrytëzuar shtetet e bllokut lindor si streha të sigurta, nga të cilat ka planifikuar aktivitete terroriste në Evropën perëndimore.
Kategoritë: Lajmet e ditës

Cikloni Debbie: Australia aktivizoi planin për përgjigje ndaj fatkeqësive

Mar, 03/28/2017 - 16:10
Kryeministri i Australisë, Malcolm Turnbull, aktivizoi planin për përgjigje ndaj fatkeqësive, pasi një ciklon i fuqishëm goditi bregdetin verilindor. Cikloni Debbie shkaktoi dëme të mëdha materiale, shira të furishëm dhe ndërprerje të energjisë elektrike në mijëra shtëpi. Helikopterët e forcës mbrojtëse dhe anijet detare do të shpërndajnë ndihma në Kuinsllend, rajonin e goditur. Kryeministri Turnbull tha se është konfirmuar një person i vdekur, por shtoi se ekipet e emergjencës pritet t’i vlerësojnë dëmet. Cikloni Debiie ka zbarkuar midis qytetit Bouen dhe plazhit Airlie si stuhi e kategorisë katër, duke shkaktuar erëra deri në 263 kilometra në orë. Fuqia e tij është zvogëluar tashmë, por autoritetet thonë se ka ende rrezik për dëme. “Kushtet janë përkeqësuar me shpejtësi. Kini kujdes dhe qëndroni të sigurt deri të mërkurën”, tha Turnbull para parlamentit.
Kategoritë: Lajmet e ditës

Dodik paralajmëron takim me Putinin

Mar, 03/28/2017 - 15:55
Presidenti i Republikës Serbe të Bosnjës, Millorad Dodik, paralajmëroi për muajin korrik takimin me presidentin e Rusisë, Vladimir Putin, raporton Shërbimi i Ballkanit i Radios Evropa e Lirë. “Takimi është pjesë e një komunikimi të rregullt, që jep rezultate”, tha Dodik. Ai ka takuar Putinin edhe në shtator të vitit të kaluar. Të hënën, ndërkaq, me Putinin është takuar edhe presidenti i Serbisë, Aleksandar Vuçiq. Perëndimi është gjithnjë e më i shqetësuar për ndikimin e mundshëm të Rusisë në Ballkan. “Rusia është partner i mirë dhe kurrë nuk kemi pasur kërkesa prej saj. Nëse Perëndimi dhe Rusia nuk funksionojnë mirë, kjo nuk do të thotë se ne duhet të jemi dëm kolateral”, tha Dodik.
Kategoritë: Lajmet e ditës

Vdiq Ahmed Kathrada, luftëtari kundër aparteidit

Mar, 03/28/2017 - 15:48
Aktivisti afrikano-jugor kundër aparteidit, Ahmed Kathrada, ka vdekur në moshën 87-vjeçare. Fondacioni i tij tha se Kathrada ka vdekur në një spital në Johanesburg, pas një sëmundjeje të shkurtër. Së bashku me Nelson Mandelën, Kathrada ka qenë në mesin e tetë aktivistëve të Kongresit Kombëtar të Afrikës, të dënuar me burgim të përjetshëm në vitin 1964. Ata janë dënuar pasi kanë bërë përpjekje të rrëzojnë qeverinë e pakicës së bardhë. Aparteidi ishte një sistem i legalizuar i diskriminimit kundër njerëzve të bardhë, i cili ka hyrë në fuqi në Afrikën e Jugut në vitin 1948. Por, ligje që kanë diskriminuar jo të bardhët kanë ekzistuar edhe para tij.
Kategoritë: Lajmet e ditës

Demarkacioni rikthehet në Kuvend, pasi që Qeveria të sigurohet për votat

Mar, 03/28/2017 - 14:58
Qeveria e Kosovës nuk e ka përcaktuar ende datën e procedimit në Kuvend të Projektligjit për ratifikimin e Marrëveshjes për demarkacionin e kufirit me Malin e Zi. Koalicioni aktual, i përbërë nga Partia Demokratike e Kosovës, Lidhja Demokratike e Kosovës dhe partitë e komuniteteve pakicë, pritet që fillimisht të zhvillojnë një takim konsultativ, para se Qeveria të ndërmarr hapin e procedimit të demarkacionit në Kuvend. Gjatë kësaj jave, megjithatë gjasat që marrëveshja të procedohet në Kuvend duken të vogla, ngaqë kryeministri Isa Mustafa ndodhet në një vizitë në Maltë. Zëdhënësi i Qeverisë së Kosovës, Faton Abdullahu tha për Radion Evropa e Lirë se kthimi i Listës Serbe në institucione, pas bojkotit prej gjashtë muajve, ka ndikuar në plotësimin e koalicionit, por ende nuk dihet saktë se kur do të procedohet Projektligji për ratifikimin e demarkacionit. “Tani, ka mbase një kualitet të ri në spektrin tonë politik, e ky është rikthimi i Listës Serbe, përkatësisht përfaqësuesve të komunitetit serb në institucionet e Kosovës. Ne konsiderojmë që kjo mund të jetë një shtytje shtesë për ta rimenduar nga palët në koalicion dhe për të mos e vonuar pajustifikueshëm as edhe një ditë më tepër, por për ta proceduar në Kuvend”, ka thënë Abdullahu. Data e saktë e procedimit të Projektligjit në Kuvend do të varet nga marrëveshja e palëve në koalicion, ka theksuar Abdullahu. Sipas tij, shenjat e para janë që Lista Serbe do ta votojë demarkacionin, çka besohet se mund t’i shtojë gjasat për ratifikimin e marrëveshjes në Kuvend, për çka kërkohen 80 vota të deputetëve. “Fakti se ata kanë thënë se do ta votojnë demarkacionin është një lajm i mirë, të cilit i gëzohemi edhe si Qeveri edhe si institucione përgjithësisht, dhe bëjmë ftesë edhe njëherë të gjithë kuvendarëve që duke i marrë parasysh të gjitha të gjeturat që janë bërë falë një pune profesionale të ekspertëve, ta votojnë demarkacionin”, ka deklaruar Abdullahu. Në anën tjetër, kryetari i Listës Serbe, Sllavko Simiq ka deklaruar se problemi i ratifikimit të demarkacionit ndërlidhet me dy partitë më të mëdha në Kosovë, PDK-në dhe LDK-në. “Sa i përket ratifikimit të marrëveshjes së kufirit, të arritur ndërmjet Qeverisë së Kosovës dhe asaj të Malit të Zi, ne kemi qenë krejtësisht të përjashtuar nga kjo temë, andaj edhe nuk kemi një qëndrim zyrtar. Por, ne do të bisedojmë për këtë çështje si brenda Listës ashtu edhe me partnerët e koalicionit, por është evidente që deri më tani nuk kishte konsensus brenda dy partive të mëdha, PDK-së dhe LDK-së”, ka thënë Simiq. Paralajmërimet për riprocedimin e demarkacionit në Kuvend, kanë nxitur edhe reagimet e opozitës, e cila nuk e mbështet marrëveshjen aktuale, duke kërkuar që të bëhet një shënjim i ri i vijës kufitare me Malin e Zi. Partitë opozitare, si edhe një numër i deputetëve në pushtet, vlerësojnë se me marrëveshjen aktuale, Kosova ka humbur mbi 8 mijë hektarë tokë. Shefi i Grupit Parlamentar të Lëvizjes Vetëvendosje, Glauk Konjufca thotë se si Demarkacioni ashtu edhe Asociacioni i komunave me shumicë serbe, janë projekte që do të kundërshtohen nga kjo parti politike. “Sa u përket Demarkacionit dhe Asociacionit, ne mendojmë se ato nuk duhet të vijnë fare në Kuvend. Janë marrëveshje të dëmshme dhe ne do t’i kundërshtojmë me çfarëdo mjetesh që kemi në dorë”, ka theksuar Konjufca. Kosova dhe Mali i Zi patën nënshkruar Marrëveshjen e demarkacionit të kufirit në gusht në vitit 2015 në Vjenë. Por, kjo marrëveshje nuk gjeti përkrahjen e opozitës si dhe të një numri të deputetëve të partive në pushtet dhe si e tillë, mbeti e paratifikuar në Kuvend. Komisioni Evropian, në anën tjetër, i ka vënë Kosovës kusht ratifikimin e kësaj marrëveshjeje, për liberalizimin e vizave. Sidoqoftë, mbetet ende diskutabile nëse Qeveria i ka siguruar 80 votat e nevojshme për ratifikimin e demarkacionit në Kuvendin e Kosovës.(REL)
Kategoritë: Lajmet e ditës

Sheshi në Moskë “riparohet” pas protestave

Mar, 03/28/2017 - 14:49
Autoritetet në Moskë kanë vënë rrethoja përgjatë Sheshit Pushkin, dy ditë pasi mijëra njerëz protestuan aty kundër korrupsionit. Sot Sheshi Pushkin është bllokuar nga rrethoja të metalta. Një njoftim i vendosur në rrethoja thoshte se sheshi është bllokuar për riparimin e monumentit të poetit rus, Aleksandr Pushkin, që gjendet në mes të sheshit. Riparimet thuhet se do të kryhen në periudhën prill-shtator, pasi autoritetet e qytetit të Moskës, kishin nënshkruar një kontrat për një gjë të tillë më 13 maj të 2016-ës. Mijëra njerëz u mblodhën në Sheshin Pushkin dhe në zonat përreth më 26 mars në protestën anti-qeveritare që kishte në fokus akuzat për korrupsion të zyrtarëve të lartë të shtetit. Policia ruse arrestoi qindra persona, përfshirë Aleksei Navalny, aktivistin kundër korrupsionit, njëherësh lideri opozitar, i cili qëndron prapa protestave, që u organizuar në pothuajse 100 qytete në mbarë Rusinë.
Kategoritë: Lajmet e ditës

1,400 zyrtarë afganë janë shkarkuar për shkak të akuzave për korrupsion

Mar, 03/28/2017 - 14:21
Ministria afgane e Mbrotjes ka shkarkuar pothuajse 1,400 zyrtarë për shkak të akuzave për korrupsion, vetëm gjatë vitit të kaluar. Zëvendësministri i Mbrojtjes, Hilaluddin Hilal u ka thënë sot gazetarëve se Ministria ka ndërmarrë hapa të rëndësishëm në luftimin e korrupsionit, duke shkarkuar 1,394 zyrtarë të saj. Më shumë se 300 zyrtarë që akuzohen për korropsion, kanë dalë para drejtësisë, ka njoftuar ai. Hilal ka njoftuar se ministria e Mbrojtjes është duke shqyrtuar mbi 1,800 pretendime për raste korruptive, në strukturat e mbrojtjes së vendit, duke shtuar se 170 raste tashmë u janë referuar agjencive për sundimin e ligjit. Këto raste përfshijë dyshime për abuzim me pushtetin dhe shitje të paligjshme të armëve. Deklaratat e sotme vijnë vetëm një ditë pasi minsitrja e Mbrojtjes njoftoi se një gjeneral afgan është arrestuar nën dyshimin për korrupsion dhe keqpërdorim të pozitës zyrtare. Sipas organizatës Transparency International, në Indeksin e Perceptimit të Korrupsionit më 2016, Afganistani u rendit në vendin e 169 nga 176 shtete. 
Kategoritë: Lajmet e ditës

Zaev thotë se bllokimi i Parlamentit po e fut vendin në krizë sociale 

Mar, 03/28/2017 - 14:16
Lideri i Lidhjes Social Demokrate të Maqedonisë Zoan Zaev ka shfaqur shpresën e tij për zhbllokimin e shpejt të punës së Parlamentit. Ai i ka cilësuar, sic ka thënë, ‘çmenduri të radhës polemikat ndërmjet deputetëve të së njëjës parti, përkatësisht VMRO DPMNE, për të penguar zgjedhjen e kryetarit të parlamentit, pavarësisht se janë deponuar nënshkrimet e 62 deputetëve në mbështetje të Talat Xhaferit si kandidat për kryetar’. “Do të bëjmë gjithçka që është e mundur në përputhje me Kushtetutën e Maqedonisë dhe rregulloren e punës së Parlamentit të Maqedonisë që proceset të ecin para sepse Maqedonisë i duhet qeveri e re. Studentët presin të marrin bursat e bllokuara. Gjithashtu edhe bujqit presin që të marrin subvencionet që u janë bllokuar. Nëse vazhdon edhe më tej bllokimi i zgjedhjes së kryetarit të parlamentit dhe pastaj zgjedhjes së qeverisë së re, në një periudhë të shkurtër kohore do të rrezikohet dhe dhënia e pagave dhe pensioneve prandaj besoj se në një afat sa më të shkurtër duhet të lëvizin proceset përpara”, ka theksuar Zaev. Ai tha se të gjithë ata të cilët janë të përfshirë në veprime kriminale do të jenë të detyruar të përgjigjen përpara organeve të drejtësisë dhe “asnjë zvarritje e proceseve demokratike dhe zvarritje e transferimit të pushtetit nuk do t`i shpëtojë”. “Bëhet fjalë për fikë nga përballja me drejtësinë. Asgjë më shumë”, ka theksuar Zaev. Edhe Bashkimi Demokratik për Integrim vlerëson se mbajtja peng e konstituimit dhe funksionimi normal i parlamentit si organ ligjvënës përmes polemikave të VMRO DPMNE nuk është në funksion të zhvillimit të proceseve demokratike. “Megjithëse...debati parlamentar e njeh edhe këtë formë, ta quajmë, të uzurpimit të foltores së parlamentit”, ka theksuar deputeti i BDI-së Xhevat Ademi. Por, deputetët e VMRO DPMNE-së, parti kjo e cila drejtohet nga ish kryeministri Nikolla Gruevski mbeten në qëndrimin se në asnjë mënyrë “nuk po e bllokojnë punën e parlamentit, por përkundrazi para opinionit dëshirojnë të sqarojnë se në rrezik futet Maqedonia me pranimin e platformës”, si e quajnë, “të Tiranës ose platformën e një shteti të huaj”. “Kërkojmë që të shohim tekstin e ligjit të gjuhës shqipe, për të cilin kanë arriturujdi partitë politike shqiptare parlamentare me LSDM para se t’i deponojnë nënshkrimet e tyre për formimin e shumicës parlamentare. Duam të dimë çka saktësisht përmbanë ky ligj jo vetëm për ne VMRO DPMNE-në si parti politike, por edhe për numrin më të madh të deputetëve nga radhët e Social Demokratëve që akoma se kanë parë tekstin e atij ligji, aq më shumë se për këtë ligj duhet të informohet i tërë opinioni”, ka theksuar deputeti i VMRO DPMNE-së Ilia Dimovski. Ai tha se “debati është një mundësi e mirë për të informuar qytetarët për pazaret që kanë bërë socialdemokratët me shqiptarët për të marrë pushtetin”. VMRO-DPMNE prezantoi të martën dokumentin se si kjo parti e sheh zgjidhjen për të përmbyllë krizën politike. Pika e parë e këtij dokumenti parasheh qëpartitë politike të arrijnë ujdi rreth asaj senëse praktika e deritanishme e koalicionimit fituesi me fituesin është faktor stabiliteti dhe se kjo praktikë duhet të ekzistojë edhe më tej apo ajo duhet të refuzohet tani, por edhe në të ardhmen. VMRO kërkon që të arrihet marrëveshje rreth mënyrës së konstituimit të Kuvendit dhe nga radhët e cilës parti duhet të zgjidhet kryetari i parlamentit. Ndryshe pas zgjedhjeve të parakohshme parlamentare në Maqedoni që pasuan një krize të thellë në të cilën ndodhej vendi, prej më shumë se dy vitesh pas publikimit të bisedave të përgjuara, deputetët në dhjetorë të vitit të kaluar mbajtën mbledhjen për konstituimin e parlamentit. Por, që prej atëherë edhe tre muaj pas Kuvendi nuk ka arritur të përmbyllë seancën e parë konstituive, për shkak të një numri të madh të deputetëve që kanë paraqitur kërkesat për fjalë dhe njëkohësisht edhe replikave brenda seancës. (REL)
Kategoritë: Lajmet e ditës

OKB: Mbi 300 civilë janë vrarë që prej nisjes së ofensivës në Mosulin Perëndimor

Mar, 03/28/2017 - 13:55
Kombet e Bashkuara thonë se më shumë se 300 civilë janë vrarë në qytetin irakian të Mosulit, që prej nisjes së ofensivës kundër militantëve të Shtetit Islamik, muajin e kaluar. Komisioneri i OKB-së për të Drejtat e Njeriut, Zeid Ra’ad al-Hussein, përmes një deklarate për media, ka thënë sot se “është e rëndësishme që forcat irakiane të sigurisë dhe partnerët e tyre të koalicionit”, të shmangin “sulmet ndaj forcave të IS-it, që gjenden në zona të banuara dhe të cilët i përdorin civilët si mburoja njerëzore gjatë sulmeve”. “Ky armik shfrytëzon pamëshirshëm civilët për t’i shërbyer qëllimeve të veta dhe në mënyrë të qartë nuk e ka problem që t’i vë ata në rrezik”, ka thënë Hussein. Zyrtarët irakianë dhe ata të Departamentit të Mbrojtjes së SHBA-së janë duke hetuar raportet se në sulmet ajrore ndaj militantëve të IS-it, mund të jenë vrarë dhjetëra por qindra persona në ditët e fundit. Hussein u ka bërë thirrje forcave irakiane dhe koalicionit ajror që udhëhiqet nga SHBA-ja, që të sigurohen që këto hetime të jenë transparente. Forcat irakiane, që mbështeten nga koalicioni ajror që udhëheq SHBA-ja, për muaj të tërë janë duke luftuar kundër IS-it në Mosul. Në muajin janar, forcat irakiane arritën të largonin militantët e IS-it nga lindja e Mosulit dhe tash e një muaj po luftojnë për të marrë nën kontroll edhe pjesën perëndimore. Më shumë se 200,000 civilë janë larguar nga Mosuli Perëndimor vetëm gjatë muajit të kaluar por rreth 600,000 të tjerë vazhdojnë të jenë në pjesët e qytetit që kontrollohen nga IS-i ka thënë OKB.
Kategoritë: Lajmet e ditës

Dhëndrri i Trumpit dëshmon për “ndërhyrjen eventuale ruse” në zgjedhje

Mar, 03/28/2017 - 13:45
Jared Kushner, dhëndrri dhe ndihmësi i presidentit të Shteteve të Bashkuara, Donald Trump, do të merret në pyetje nga një komitet amerikan, i cili po heton lidhjet e dyshuara midis ekipit të Trumpit dhe Rusisë. Shtëpia e Bardhë tha se Kushner është vullnetar për të folur me Komitetin e Senatit për Inteligjencë. “Kushner nuk do të thirret në imunitet dhe do të dëshmojë në Komitetin e Senatit për Inteligjencë, në kuadër të hetimeve për përzierjen e Rusisë në zgjedhjet presidenciale”, tha Shtëpia e Bardhë. Komiteti i Senatit për Inteligjencë është duke hetuar ndërhyrjen e pretenduar të Rusisë në zgjedhjet presidenciale në SHBA, më 2016. Komuniteti i inteligjencës beson se hakerët rusë kanë pirateruar kompjuterë, në favor të Trumpit. Rusia i ka mohuar akuzat, ndërsa Trump ka thënë se këto janë “lajme të rreme”. Kushner do të merret në pyetje për dy takime që ka aranzhuar me zyrtarët rusë si ndihmës i lartë i Trumpit, gjatë tranzicionit, raporton New York Times. Takimi i parë ishte me ambasadorin rus në SHBA, Sergei Kislyaj, në Kullën Trump në Nju Jork, dhjetorin e kaluar. Takimi i dytë, ndërkaq, ishte me kreun e Bankës për Zhvillim të Rusisë. Zëdhënësi i Shtëpisë së Bardhë, Sean Spicer, tha se Kushner nuk është thirrur në privilegjin ekzekutiv dhe do të dëshmojë, sepse, gjatë fushatës, ai ka shërbyer si “kanal për udhëheqësit”. “Ky ka qenë roli i tij dhe ai do të tregojë se është i pastër”, tha Spicer. Stafi i Shtëpisë së Bardhë i ka thënë gazetës New York Times se ekipi i presidentit, në mënyrë rutinore, ka takuar delegacione ruse dhe të tjera të huaja. Edhe zëdhënësi i Kremlinit, Dmitry Peskov, tha se takimet e Kushnerit me zyrtarët rusë kanë qenë “rutinore”. “Udhëheqësit e bankës kanë pasur dhjetëra takime të tilla si me Kushnerin”, tha Peskov. Kushner u tha mediave se “qeveria duhet të udhëhiqet si kompani e madhe amerikane”. Ai është investues në prona dhe është i martuar me vajzën e Trumpit, Ivanka. Kushner e këshillon presidentin për marrëdhëniet me jashtë. (REL) Përgatiti: Valona Tela
Kategoritë: Lajmet e ditës

BE i bën thirrje Hungarisë të respektojë rregullat për azil

Mar, 03/28/2017 - 13:18
Hugaria duhet të sigurojë se politika e re për ndalimin e migrantëve në kufi, nuk thyen rregullat e BE-së për mbrojtjen e njerëzve që kërkojnë azil, ka thënë sot Komisioni Evropian,teksa kjo politikë ka hyrë në fuqi në Hungari. Komisioneri Dimitris Avramopoulos është takuar sot me zyrtarë hungarezë dhe ka thënë se ekspertët do të diskutojnë për rregullat e reja për azilkërkuesit, duke thënë se Hungaria duhet të mos i shkel rregullat e BE-së. Sipas ligjit të ri, që sot ka hyrë në fuqi në Hungari, ky shtet ka të drejtë të ndalojë të gjithë azilkërkuesit në kufi dhe t’i vendos në kampe. Ky vendim i Budapestit është kritikuar nga agjencitë e OKB-së dhe organizatat e të drejtave të njeriut. "Në frymën e miqësisë dhe bashkëpunimit pozitiv, ne kemi vendosur që të punojmë së bashku, që të sigurohemi se rregullat e BE-së do të respektohen”, ka thënë Dimitri Avramopoulos, gjatë një konference për media në Budapest. “Parimet evropiane janë të përbashkëta dhe të gjitha shtetet anëtare janë pajtuar që ato duhet të respektohen dhe zbatohen nga të gjithë”, ka thënë tutje ai. Agjencia e OKB-së për refugjatë, UNHCR ka thënë se Hungaria do të shkelë ligjin ndërkombëtar dhe të BE-së, nëse arreston fëmijë. 
Kategoritë: Lajmet e ditës

Hoyt Yee qëndron në Kosovë

Mar, 03/28/2017 - 12:40
Zëvendës-ndihmës Sekretari i shtetit, përgjegjës për çështjet evropiane dhe euro-aziatike, Hoyt Brian Yee, ka filluar vizitën dy ditore në Kosovë. Yee fillimisht ka zhvilluar takim me kryetarin e Kuvendit, Kadri Veseli.
Kategoritë: Lajmet e ditës

Rusi: Janë rrahur korrespondentët e Radios Evropa e Lirë

Mar, 03/28/2017 - 12:38
Dy korrespondentë të Radios Evropa e Lirë/Radio Liria, janë rrahur dhe plaçkitur nga sulmues të maskuar në pjesën jugore të Rusisë. Disa vetë sot në mëngjes e sulmuan reporterin, Sergei Khazov-Cassia dhe kameramanin, Andrei Kostyanov, derisa ata po largoheshin nga hoteli i tyre në Kropotkin, në rajonin, Kransodar Krai. Sulmuesit e kanë marrë një kompjuter, pajisje televizive dhe gjërat personale dhe janë larguar në këmbë, duke e braktisur makinën me të cilin kishin ardhur. “Ky sulm i dhunshëm në reporterët tanë, që vepronin në kapacitetin e tyre profesional dhe raportonin për ngjarje, është i papranueshëm”, tha presidenti i Radios Evropa e Lirë/Radio Liria, Thomas Kent, dhe ka shtuar se “kërkojmë hetim të plotë, me fokus në rolin e policisë lokale në këtë incident, për tu siguruar se ky nuk është një tjetër krim kundër gazetarëve në Rusi, që nuk ndëshkohet”. 
Kategoritë: Lajmet e ditës

Konfirmohet se dhëndëri i Trumpit do të dëshmojë për kontaktet ruse

Mar, 03/28/2017 - 12:15
Komiteti i inteligjencës i Senatit të Shteteve të Bashkuara ka konfirmuar mbrëmë se Jared Kushner, dhëndër dhe këshilltar i lartë i presidentit, Donald Trump, do të dëshmoj vullnetarisht lidhur me hetimet për përfshirje të dyshuar ruse në zgjedhjet presidenciale amerikane në vitin 2016. Në një deklaratë të përbashkët, senatori republikan, Richard Burr, dhe ai demokrat, Mark Warner, theksojnë se presin që Kusher “do të jetë në gjendje të përgjigjet në pyetjet kryesore që janë shtruar” në hetimin e komitetit. Nuk është e qartë se a do të jetë dëshmi nën betim apo jo. Më herët, e përditshmja, New York Times, ka raportuar se Jared Kushner, një herë ishte takuar me ambasadorin e Rusisë, Sergei Kislyak, gjatë periudhës tranzitore. Pas kësaj, Kislyak kishte kërkuar edhe një takim, por raportohet se Kushner në takim e kishte dërguar një ndihmës. Jared Kushner, që është i martuar me Ivanka Trumpin, vajza e presidentit Trump, ishte i angazhuar për kontakte të jashtme për Donald Trumpin gjatë periudhës tranzitore, prej zgjedhjeve në nëntor dhe inaugurimit të Trumpit në janar të këtij viti.
Kategoritë: Lajmet e ditës

Gjykata e lartë e BE-së mbështet sanksionet kundër kompanisë Rosneft

Mar, 03/28/2017 - 12:10
Një gjykatë e lartë e BE-së ka vendosur se sanksionet e BE-së ndaj gjigantit rus të energjisë, Rosneft, për shkak të aneksimit të paligjshëm të gadishullit të Krimesë nga Moska dhe përfshrijes në konfliktin në lindje të Ukrainës, janë të ligjshme. Gjykata Evropiane e Drejtësisë ka njoftuar përmes një deklarate për media, më 28 mars se “masat kufizuese... në përgjigje ndaj krizës në Ukrainë kundër ndërmarrjeve ruse, përfshirë Rosneft, janë të ligjshme”. Bashkimi Evropian vendosi sanksione ndaj Rusisë në korrik të vitit 2014, pasi Moska aneksoi gadishullin ukrainas të Krimesë. Më vonë saksionet u zgjeruan, për shkak të mbështetjes së Moskës për separatistët që luftojnë kundër forcave ukrainase në lindje të Ukrainës. Gjykata tha se vendimi i saj për pengimin që kompania e kontrolluara nga shteti i Rusisë, Rosneft që të bëjë biznes në BE, ishte në proporcion me shkallën e sanksioneve ekonomike të vendosura ndaj Rusisë. Kompania Rosneft, ka reaguar për këtë vendim, duke thënë se është zhgënjyer nga vendimi i gjykatës, duke shtuar se “vendimi dëshmon se sundimi i ligjit në Evrpë po zëvendësohet , duke vënë në rend të parë situatën politike”. Avokati i kësaj kompanie, Lode van den Hende ka thënë se vendimi ishte “kthim prapa për mbrojtjen gjyqësore në BE”. Rosneft drejtohet nga Igor Sechin, aleat i ngushtë i presidentit rus, Vladimir Putin. Kjo kompani u bë njëri prej prodhuesve më të mëdhenj të naftës pasi morri asetet e prodhimit të kompanisë Yukos, e cila u shpërbë dhe u shit, pas arrestimit të ish-shefit të saj, Mikhail Khodorkovski më 2003. Khodorkovski ka qëndruar 10 vjet në burg, pasi u dënua dy herë për krime financiare,akuza të cilat, ai dhe mbështetësit e tij, thonë se janë orkestruar nga Kremlini për ta ndëshkuar atë, pasi ka sfiduar Putinin për marrjen e kontrollit të kompanisë Yukos. Kompania e naftës dhe gazit, Rosneft, ka sfiduar kufizimet e vendosura nga BE-ja, të cilat ia pamundësojnë nënshkrimin e kontratave të naftës brenda shteteve të BE-së. Vendimi i gjykatës shihet si vendosje e juridiksonin e saj mbi politikën e përbashkët të jashtme të BE-së, gjë që është kontestuar nga disa shtete anëtare të BE-së. (REL)
Kategoritë: Lajmet e ditës

Guterres kërkon që shtetet e përçara arabe të ndihmojnë lidhur me Sirinë

Mar, 03/28/2017 - 11:55
Sekretari i përgjithshëm i Kombeve të Bashkuara, Antonio Guterres, u ka bërë thirrje shteteve arabe që t’i lënë anash dallimet dhe të ndihmojnë në përfundimin e luftës civile gjashtëvjeçare në Siri. Këtë thirrje ai e bëri sot gjatë vizitës në kampin e refugjatëve, Zaatari në Jordani, një ditë para se të marrë pjesë në samitin madhor arab, që këtë vit mbahet në Jordani. Zoti Guterres thotë se përçarjet arabe lidhur me Sirinë, u kanë dhënë nxitje të paqëllimshme grupeve terroriste, duke lejuar “të tjerët të intervenojnë ose t’i manipulojnë situatat, duke krijuar jostabilitet dhe duke e lehtësuar jetën e organizatave terroriste”. Turqia, Rusia dhe Irani, janë bërë lojtarët kryesorë në këtë konflikt, nga i cili janë vrarë mijëra vetë dhe qindra mijëra të tjerë janë zhvendosur, raporton AP. Sekretari i përgjithshëm i Kombeve të Bashkuara, Antonio Guterres, theksoi se tashmë janë mbyllur edhe më tepër dyer për të zhvendosurit dhe se duke mos i ndihmuar refugjatët, bota paqëllimshëm i forcon grupet terroriste dhe i shton rreziqet për sigurinë globale. 
Kategoritë: Lajmet e ditës

Qeveria i jep leje Vuçiqit të vizitoj Kosovën

Mar, 03/28/2017 - 11:49
Qeveria e Kosovës ka marrë vendim që t’i lejoj kryeministrit të Serbisë, Aleksandër Vuçiq që të vij në Kosovë, në vizitën e paralajmëruar për fushatë zgjedhore. Lajmin e ka bërë të ditur ministri i Jashtëm i Kosovës, Enver Hoxhaj, gjatë konferencës për media që ka mbajtur pas takimit me ministrin e Jashtëm të Luksemburgut. Ministri ka thënë se 'pas kushteve të shumta të vëna nga ana e Qeverisë së Kosovës dhe pas diskutimeve të fundit në lidhje me vizitën është marrë vendimi për lejimin e tij që të vij në Kosovë'. "Kjo do të jetë edhe hera e fundit që lejohen të hyjnë zyrtarë serbë me qëllime të bërjes fushatë", ka thënë Hoxhaj. Ai ka thënë se vendimi është marrë në frymën e shprehjes së vullnetit të mirë ndaj miqve ndërkombëtar sikurse Gjermania dhe Bashkimi Evropian.
Kategoritë: Lajmet e ditës
Kritiket-Blog Letersi Kritika-dejavu Kalendar