Skip to content

Radio Evropaelire-Lajme

Përmbajtje e sindakuar Radio Evropa e Lirë
Radio Evropa e Lirë është organizatë ndërkombëtare e lajmeve dhe e transmetimeve për Evropën Qendrore dhe Lindore, Kaukazin, Azinë Qendrore, Rusinë, Lindjen e Mesme dhe Ballkanin.
Rifreskimi: 13 javë 1 ditë më parë

Statujë për sekretarin Seward që nëshkroi traktatin për blerjen e Alaskës

Dje, 06/25/2017 - 11:57
Në Juneau të Alaskës do të vendoset një statujë e ish sekretarit të SHBA-së, William Henry Seward. Kjo statujë, që do të vendoset në datën 3 korrik është punuar në shenjë nderimi për sekretarin i cili nënshkroi traktatin me Rusinë që solli Alaskën në kontrollin e SHBA-së. Mary Becker, bashkëkryesuese e Komitetit për statujën e Sewardit, ka thënë se statuja do të përkujtojë përvjetorin e 150-të të Traktatit të vitit 1867 që e bëri Alaskën një territor të SHBA-së. Statuja në vlerë 250,000 dollarë do të vendoset në sallën e Gjykatës Dimond. Shtetet e Bashkuara kanë blerë Alaskën nga Rusia në vlerë të 7.2 milionë dollarëve. Alaska u pranua si shtet i SHBA-së në vitin 1959.  
Kategoritë: Lajmet e ditës

Talibanët sulmojnë digën Salma në Afganistan

Dje, 06/25/2017 - 10:28
Zyrtarët afganë kanë thënë se dhjetë pjestarë të forcave të sigurimit janë vrarë nga militantët talibanë, gjatë një sulmi në digën Salma, në Afganistan. Zëdhënësi i guvernatorit të Heratit, Farhad Jailani, ka thënë se gjatë sulmit katër policë janë lënduar dhe katër militantë janë vrarë në provincën Herat. Kjo digë është duke u ruajtur me shumë kujdes pasi e njejta ka qenë objektiv i sulmeve talibane edhe në të kaluarën. Aktualisht diga hidroelektrike  në këtë provincë është duke u renovuar  dhe shpenzimet kapin shifrën e 300 milionë dollarëve.  
Kategoritë: Lajmet e ditës

Shqipëria voton

Dje, 06/25/2017 - 10:15
Mbi 3 milionë e 450 mijë qytetarë të Shqipërisë, janë thirrur të ushtrojnë të drejtën e tyre të votës për zgjedhjet parlamentare të radhës, pjesëmarrja në të cilat si zakonisht, kushtëzohet fort nga numri i lartë i emigrantëve që e kanë të pamundur të jenë pjesë e procesit.(Video: Reuters)
Kategoritë: Lajmet e ditës

Kryeministri indian Modi do të takojë presidentin Trump

Dje, 06/25/2017 - 09:51
Kryeministri indian, Narendra Modi po udhëton në SHBA, për t’u takuar me presidentin amerikan, Donald Trump dhe liderët e Kongresit të SHBA-së. Gjatë këtyre takimeve synohet lehtësimi i pengesave për tregti dhe investime në tregun indian. Ligjvënësit republikanë dhe demokratë, me anë të një letre, i kanë kërkuar presidentit Trump të bëjë presion ndaj udhëheqësit indian për hapjen e tregut indian. "Shumë sektore të ekonomisë indiane mbeten shumë të mbrojtura dhe India vazhdon të jetë një vend i vështirë për kompanitë amerikane në të bërit biznes", kanë shtuar më tutje ligjvënësit. "Nëse ka ndonjë gjë që duam nga takimet, është krijimi i frymës së bashkëpunimit ", ka thënë një zyrtar i lartë indian. Tensionet midis Trump dhe Modi janë ngritur kohët e fundit pasi udhëheqësi indian pati deklaruar se në SHBA “po shtohen qëndrimet proteksioniste”. Nju Delhi gjithashtu ka shprehur shqetësime lidhur me ndryshimet e propozuara për një lloj të vizave që përdorin mijëra inxhinierë indianë për të punuar në Shtetet e Bashkuara.
Kategoritë: Lajmet e ditës

Kinë: 24 persona të vdekur nga shembja e dheut

Dje, 06/25/2017 - 08:53
Ekipet e shpëtimit në Kinë kanë vazhduar kërkimet në ditën e dytë për më shumë se 100 persona të cilët supozohet të kenë mbetur nën rrënoja, pas një rrëshqitjeje masive të dheut në provincën Sichuan. Rreth 40 shtëpi të fshatit Xinmo, u përfshin nga shembja e cila bllokoi edhe dy kilometra të lumit. Sipas departamentit të propagandës në Xinmo, gjatë ditës së sotme janë gjetur edhe nëntë trupa të tjerë, duke e rritur numrin e trupave të vdekur në 24, derisa 109 persona janë ende të pagjetur. “Nuk kemi arritur të nxjerrin askënd të gjallë”, ka thënë Wu Youheng, banor i një fshati të afërm i cili ka ndihmuar ekipet e shpëtimit. Sipas autoriteteve, shiu i rrëmbyeshëm e ka shkaktuar fatkeqësinë, duke njoftuar se reshje të reja priten në ditët në vijim. Rrëshqitjet e dheut janë një rrezik i shpeshtë në pjesët rurale dhe malore të Kinës, veçanërisht në kohën e shirave të dendur. Të paktën 12 persona janë vrarë në janar, pas një rrëshqitje të dheut, në një hotel në qendër të provincës Hubei.
Kategoritë: Lajmet e ditës

Pakistan: 120 persona vdesin nga zjarri pas përmbysjes së një kamioni cisternë

Dje, 06/25/2017 - 07:30
Ekipet e shpëtimit në Pakistan kanë njoftuar se më shumë se 120 persona kanë vdekur dhe shumë të tjerë janë lënduar në një autostradë në jugperëndim të qytetit të Multan, pasi një kamionë cisternë me karburante u përmbys dhe shkaktoi një zjarr masiv. Kamioni u përmbys në mëngjesin e ditës së sotme pasi ngasësi i kamionit e humbi kontrollin. Kreu i ekipit të shpëtimit në provincën e Punjabit, Rizwan Naseer, është cituar të ketë thënë, se shumë persona tashmë janë vështirë të identifikueshëm, si shkak i zjarrit të madh. Zyrtari i lartë i qeverisë lokale, Rana Mohammad Saleem Afzal, i ka thënë televizionit shtetëror se numri i të vdekurve ka shkuar në 123 ndërsa më shumë se 100 janë të lënduar. Ushtria paksitaneze ka deklaruar se do të dërgojë disa helikopterë për të larguar të lënduarit nga  vendi i ngjarjes. Televizioni Geo, ka cituar disa dëshitarë të cilët kanë thënë se disa persona kanë qenë duke konsumuar duhan, çka sipas tyre mund të ketë qenë shkaku i nisjes së zjarrit.
Kategoritë: Lajmet e ditës

Rexhepi: Bashkësia Fetare Islame të ketë status të barabartë me Kishën Ortodokse maqedonase

Dje, 06/25/2017 - 07:19
Kryetari i Bashkësisë Fetare Islame në Maqedoni, Sulejman Rexhepi, në një intervistë për Radion Evropa e Lirë thotë se institucioni që drejton, është diskriminuar në vazhdimësi në dhjetë vjetët e fundit dhe kjo praktikë, shton ai, përfundimisht duhet të ndërpritet. Për këtë arsye, ai thotë se i është drejtuar Qeverisë së Republikës së Maqedonisë me një shkresë, përmes së cilës kërkohet trajtim i barabartë i Bashkësisë Fetare Islame dhe Kishës Ortodokse në Maqedoni, përkatësisht aq sa investon shteti te Kisha Ortodokse po aq të investojë edhe te Bashkësia Fetare Islame. Kjo për faktin, siç thekson Rexhepi, se ky institucion më vete ngërthen rreth 1 milion besimtarë mysliman në Maqedoni, të të gjitha përkatësive etnike me theks ata shqiptarë. “Ne e falënderojmë Zotin për këtë multi-etnicitet që na ka dhuruar në këtë nënqiell, por fatkeqësisht neve si institucion, na diskriminoi politika shumëvjeçare që e udhëheq shtetin që nga pavarësia e Maqedonisë. Kërkesat tona kanë të bëjnë me atë që ajo, e cila na garantohet me nenin 19 të Kushtetutës së Maqedonisë ku të gjitha bashkësitë fetare gëzojnë të drejta të barabartam të mos mbetet vetëm në teori, por të jetësohet kjo dispozitë ligjore edhe në praktikë”, thekson Rexhepi. Ai nënvizon se politikat diskriminuese të shtetit ndaj Bashkësisë fetare Islame të Maqedonisë, kanë të bëjnë si në aspektin financiar, ashtu dhe goditjet që i janë bërë këtij institucioni përmes qarqeve të caktuara, por gjithmonë të mbështetura nga institucionet e shtetit. Kryetari i Bashkësisë Fetare Islame në Maqedoni, në festën e FitërBajramit, ka përcjellë porosi paqeje dhe mirëkuptimi ndërmjet njerëzve për të gjithë besimtarët myslimanë në Maqedoni, por edhe për ata të cilët ndodhen me punë të përkohshme në vendet e Evropës dhe në mbarë botën. Ai në bisedën për Radion Evropa e Lirë, thekson se në kohën që Evropa gjendet nën ankthin e sulmeve tororise, nga të cilat ethe nuk e anashkalon as Maqedoninë përmes departamentit të veçantë të BFI të Maqedonisë, thotë se imamët shqiptarë që emërohen në diasporë me dekretin e institucionit që përfaqëson, duhet të angazhohen për reflektimin e imazhit të paqes që për burim ka frymën e Kuranit, duke u kujdesur me përkushtim që këto parime të mos devijohen. “Imamët, të cilët janë zgjedhur në diasporë me dekretimin tonë, sepse i drejtohen xhematit tonë atje duke e ditur përgatitjen e tyre profesionale do t’i kisha lutur të jenë të vëmendshëm të ruajnë të ruajnë imazhin e islamit si sytë e ballit dhe njëherësh të prezantojnë islamin ashtu siç është në të vërtetë, reflektim i paqes dhe tolerancës”, shton Rexhepi. Ai njëherësh thekson se marrëdhëniet ndërfetare në Maqedoni në mesin e qytetarëve të të gjitha konfesioneve, janë të mira, por këto raporte atakohen jo rrallë nga politika. “Për fat të keq, nëna e të gjitha të mirave ose nëna e të gjitha të këqijave është politika ajo, e cila menaxhon me vendin. Po qe se politika është politikë raciste, është politikë e cila vuan nga komplekset e ndryshme siç është realiteti ynë, atëherë ajo për qëllime të caktuara tenton t’i çrregullojë, t’i prishë marrëdhëniet ndërfetare". “Të përmend vetëm një rast në këtë drejtim. Ka dashur ose jo politikës së ish-qeverisë pak muaj më parë i është nënshtruar Kisha Ortodokse Maqedonase, e cila ka blerë pronat e BFI-së me një çmim simbolik nga Ministria e Financave. Është e paimagjinueshme se si xhamia e Shtipit, monument kulturo- historik i shitet Eparhisë së Shtipit. Jo që s`na kthehen pronat tona me procesin e denacionalizimit, por ata edhe shiten para syve tonë... kjo i tendos raportet ndërfetare”, deklaron Rexhepi. Kryetari i Bashkësisë Fetare Islame të Maqedonisë, Sulejman Rexhepi njëherësh të gjithë besimtarëve myslimanë në Maqedoni u ka uruar festën e Bajramit duke u dëshiruar prosperitet dhe shumë begati.
Kategoritë: Lajmet e ditës

Shqipëri: Udhëheqësit politikë, thirrje për pjesëmarrje në votim

Dje, 06/25/2017 - 06:54
Nga ora 07:00 e mëngjesit, në Shqipëri janë hapur qendrat e votimit për zgjedhjet parlamentare. Të drejtë vote kanë mbi milionë e 452 mijë votues.
Kategoritë: Lajmet e ditës

Tërnava fton të ruhet islami i pastër e të mos devijohen parimet e tij

Dje, 06/25/2017 - 05:07
Besimtarët myslimanë në Kosovë po kremtojnë festën e Fitër Bajramit. Shënimi i kësaj feste ka nisur në orët e para të mëngjesit të së dielës në të gjitha xhamitë në Kosovë, ndërkohë që manifestimi qendror është mbajtur në Xhaminë e Madhe në Prishtinë.
Kategoritë: Lajmet e ditës

Kremtohet Fitër Bajrami

Dje, 06/25/2017 - 05:03
Besimtarët myslimanë në mbarë botën kremtojnë festën e Fitër Bajramit. Fitër Bajrami ka pasuar muajin e shenjtë të Ramazanit, gjatë së cilit, sipas besimit Islam, agjërohet 30 ditë, në shenjë sakrifice dhe përkushtimi ndaj Zotit. Në Kosovë, manifestimi kryesori është mbajtur në Xhaminë e Madhe të Prishtinës " Sulltan Mehmet Fati".(Vdieo: Bujar Tërstena)
Kategoritë: Lajmet e ditës

Besimtarë myslimanë festojnë Fitër Bajramin

Dje, 06/25/2017 - 04:15
Besimtarët myslimanë në mbarë botën kremtojnë sot festën e Fitër Bajramit. Festa e Fitër Bajramit ka pasuar muajin e shenjtë të Ramazanit, gjatë të cilit, sipas besimit Islam, agjërohet 30 ditë, në shenjë sakrifice dhe përkushtimi ndaj Zotit. Në Kosovë, manifestimi kryesori është mbajtur në Xhaminë e Madhe të Prishtinës " Sulltan Mehmet Fati".
Kategoritë: Lajmet e ditës

SHBA: Shitja e dronëve në Indi nuk është kërcënim për Pakistanin

Sht, 06/24/2017 - 17:37
Administrata e presidentit Trump nuk beson se shitja e dronëve të teknologjisë së lartë në Indi paraqet një kërcënim për Pakistanin, ka njoftuar një zyrtar i lartë i Shtëpisë së Bardhë. Duke folur me gazetarët në Shtëpinë e Bardhë, ky zyrtar ka thënë se vendimi për shitjen e këtyre pajisjeve është marrë duke pasur parasysh marrëdhëniet e tensionuara midis Islamabadit dhe Nju Delhit, veçanërisht në rajonin e kontestuar të Kashmirit, ku ka lëvizje sporadike të dhunës. Këto deklarata janë bërë përpara vizitës së parë të kryeministrit indian, Narendra Modi me presidentin e SHBA-vë, Donald Trump më 26 qershor. "Ne duam të shmangim situatat tensionuese" midis Indisë dhe Pakistanit. Këto dy vende duhet të angazhohen në bisedime të drejtpërdrejta dhe të kërkojnë normalizimin e marrëdhënieve, ka thënë zyrtari, i cili është deklaruar në kushte anonimiteti. Kompania amerikane General Atomics Aeronautical Systems, që prodhon këto pajisje, ka thënë se qeveria tashmë ka miratuar shitjen e 22 dronëve të paarmatosur me vlerë 2 miliardë dollarë në Indi. Flota indiane dëshiron që me këta dronë të mbajë në kontroll Oqeanin Indian, ku është në rritje prania e Kinës në det. Kjo do të ishte shitja e parë e dronëve të tillë në një vend që nuk është anëtar i NATO-s.  
Kategoritë: Lajmet e ditës

Izraeli sulmon Sirinë pas incidentit me predha artilerie

Sht, 06/24/2017 - 16:58
Forcat ajrore të Izraelit kanë njoftuar se kanë kryer sulme brenda Sirisë në përgjigje të disa predhave artilerie që u hodhën në Golan, territor i kontestuar izraelit. “Në përgjigje të sulmit me mbi 10 predha artilerie të nisura nga Siria, aeroplani i forcave ajrore izraelite goditi vendin se prej nga janë nisur ato”, ka njoftuar ushtria izraelite përmes Twitterit. Predhat e artilerisë thuhet se u ulën në Golan, vend sirian i cili është pushtuar nga Izraeli në vitin 1967. Ky është ende vend diskutabil në mes të Izraelit dhe Sirisë. Askush nuk është raportuar i plagosur nga hedhja e këtyre predhave. Gazeta izraelite Haaretz ka raportuar për një burim ushtarak të ketë thënë se predhat kanë ardhur si shkak i përleshjeve në luftën e vazhdueshme civile në Siri. Ushtria izraelite paralajmëroi civilët në këtë zonë, duke u thënë atyre të shmangin zonën përgjatë kufirit të diskutueshëm.
Kategoritë: Lajmet e ditës

Parlamenti britanik cak i sulmeve kibernetike

Sht, 06/24/2017 - 16:22
Zyrtarë të Mbretërisë së Bashkuar kanë thënë se janë duke hetuar një sulm kibernetik që goditi sistemin e postës elektronike të Parlamentit britanik. Zëdhënësja e Dhomës së Përfaqësuesve ka thënë se kanë zbuluar disa përpjekje të paautorizuara për të hyrë në rrjet. Ajo shtoi se Qendra Kombëtare për Siguri Kibernetike është duke shqyrtuar sulmin dhe po e siguron rrjetin. Shërbimi Kombëtar Shëndetësor i Mbretërisë së Bashkuar u godit nga një sulm i madh kibernetik gjatë muajit maj i cili ndikoi në sistemet e tjera në mbarë botën.
Kategoritë: Lajmet e ditës

Beograd: Aktivistët e komunitetit LGBT marshuan nën masa të rrepta sigurie

Sht, 06/24/2017 - 15:19
Nën masa të rrepta të sigurisë, shumë aktivistë të komunitetit LGBT, janë mbledhur në Beograd për të festuar në kuadër të organizimeve që po mbahen në shumë vende të botës, për të drejtat e këtij komuniteti. Derisa marshonin, rreth 100 aktivistë, mbanin me vete mbishkrimet “duam jetë dinjitoze për njerëzit” dhe “vlerësojmë mbështetjen”. Parada është organizuar nga disa organizata lokale me sloganin “Le të dëgjohet zëri ynë”. Organizatorët përmes një deklarate kërkuan zero tolerancë për dhunën  ndaj këtij komuniteti. Ani pse në numër të vogël, disa persona nga Kisha Ortodokse Serbe e kundërshtuan paradën. Parada ka përfunduar pa asnjë incident serioz. Aktivistët përshëndetën propozimin për kryeministren e parë lezbike duke e konsideruar këtë, si hap historik për vendin e Ballkanit. Ndërkohë, parlamenti serb është mbledhur për të nisur procedurat e nevojshme për zgjedhjen e Ana Brnabiq si kryeministre e re. Nëse votohet, 41-vjeçarja Brnabiq do të bëhet kryeministrja e parë e Serbisë dhe personi i parë në këtë pozitë si pjesë e komunitetit LGBT. Gjatë një parade të tillë të mbajtur më 2010, rreth 150 persona mbetën të lënduar, pasi nacionalistët serbë i sulmuan personat që po marshonin dhe u përleshën më pas me policinë.
Kategoritë: Lajmet e ditës

Vdes gazetarja franceze, e lënduar gjatë shpërthimeve në Mosul

Sht, 06/24/2017 - 14:34
Televizioni francez ka bërë të ditur se ka vdekur gazetarja franceze, Veronique Robert, e cili ishte plagosur në të njëjtën shpërthim mine, që vrau dy kolegë të saj në qytetin irakian, Mosul, gjatë kësaj jave. Robert ishte operuar në Bagdad dhe më pas u nis për trajtim në Francë, por vdiq nga plagët e marra, ka thënë transmetuesi francez. Gazetarët po shoqëronin forcat speciale të Irakut gjatë betejës për të rimarrë Mosulin nga grupi ekstremist Shteti Islamik.      
Kategoritë: Lajmet e ditës

Kosova afër anëtarësimit në INTERPOL

Sht, 06/24/2017 - 13:16
Autoritetet në Kosovë presin që gjatë këtij viti Kosova të jetë anëtare e organizatës më të madhe të policisë në botë, INTERPOL.
Kategoritë: Lajmet e ditës

Turqia ndalon marshin e komunitetit LGBT për "arsye të sigurisë"

Sht, 06/24/2017 - 13:06
Zyra e guvernatorit të Stambollit ka ndaluar një marsh të planifikuar nga komuniteti LGBT në këtë qytet. Kjo zyrë ka bërë të ditur se parada është ndaluar për “shkak të sigurisë së pjesëmarrësve, turistëve”, dhe “rendit publik”. Aktivistët turq të këtij komuniteti patën njoftuar përmes rrjeteve sociale se me datën 25 qershor do të organizonin marshin në sheshin Taksim. Zyra e guvernatorit ka deklaruar se sheshi Taksim në Stamboll nuk është i projektuar për protesta dhe se nuk kanë pranuar ndonjë kërkesë të përshtatshme. Kjo zyrë ka shtuar se disa grupe kanë ngritur “ reagime serioze” kundër këtij marshi. Alperen Hearths, grup i ekstremit të djathtë, i lidhur me partinë politike ultranacionaliste, ka kërcnuar javën e kaluar se do të ndalojë mbajtjen e kësaj parade edhe nëse autoritetet e lejojnë një gjë të tillë. Paradat e komunitetit LGBT mbahen në Stamboll gjatë dekadës së fundit, mirëpo në vitin 2015 policia e ndaloi marshin duke përdorur gaz lotësjellës dhe topa uji. Në marshin e vitit 2014, më shumë se 100,000 persona u patën mbledhur në Stamboll, duke shënuar një nga paradat më të mëdha të komunitetit LGBT, në botën myslimane.
Kategoritë: Lajmet e ditës

Rezultatet e provimit të maturës shtetërore në korrik

Sht, 06/24/2017 - 12:48
Komisioni Shtetëror i Maturës në Kosovë, përmes një njoftimi për media, ka vlerësuar se provimi i Maturës Shtetërore ka përfunduar me sukses. Provimi është mbajtur të shtunën në 201 qendra të testimit, ndërsa për mbarëvajtjen dhe administrimin e tij janë angazhuar 2100 administrues dhe 600 komisionarë. “Provimi ka filluar me kohë në të gjitha qendrat, pasi që testet janë shpërndarë dhe nuk ka pasur mungesa të testeve. Edhe në këtë pjesë, tentimet për kopjim dhe shpërndarje të testit në rrjetet sociale kanë qenë shumë më të pakta se në të kaluarën”, Derisa, në rastet kur ka pasur tentime të tilla, janë identifikuar dhe raportuar dhe ndaj tyre do të merren masat që i përcakton Ligji”, thuhet në njoftim. Rezultatet e provimit të maturës shtetërore, bëhet e ditur, se do të publikohen më 3 korrik 2017, në të gjitha shkollat ku nxënësit kanë mbaruar shkollimin e mesëm të lartë. Ndryshe, provimi i maturës shtetërore vlerëson arritjet e njohurive, shkathtësive dhe aftësive të nxënësve, të cilat i kanë fituar gjatë arsimimit parauniversitar në përputhje me kurrikulën e Republikës së Kosovës. Po ashtu, si test përcakton edhe nivelin e kompetencave të arritura të nxënësve, dhe përfundimi me sukses i këtij testi mundëson më pas aplikimin për studime në universitet. Pragu i kalueshmërisë në provimin e maturës shtetërore sipas Ligjit për provimin e maturës shtetërore është 40 për qind.  
Kategoritë: Lajmet e ditës

Irani paralajmëron SHBA-në për balancat në Lindjen e Mesme

Sht, 06/24/2017 - 12:14
Shefi i energjisë atomike në Iran, Ali Akbar Salehi, i cili ndihmoi në krijimin e marrëveshjes bërthamore të vitit 2015, ka paralajmëruar SHBA-në, rreth shqetësimeve për balancimin e pushtetit në Lindjen e Mesme.
Kategoritë: Lajmet e ditës
Kritiket-Blog Letersi Kritika-dejavu Kalendar